የቃል ትምህርት
...my word that goes out from my mouth: it
will not return to me empty, but will accomplish
what I desire and achieve the purpose for which
I sent it. Isaiah 55:11
ጸሎት ዘዘወትር
00:00/00:00
-
ጸሎተ ሃይማኖት
በድምጽጸሎተ ሃይማኖት
ነአምን በአሐዱ አምላክ እግዚአብሔር አብ አኃዜ ኲሉ ገባሬ ሰማያት ወምድር ዘያስተርኢ ወዘኢያስተርኢ። ወነአምን በአሐዱ እግዚእ ኢየሱስ ክርስቶስ ወልደ አብ ዋሕድ ዘህልው ምስሌሁ እምቅድመ ይትፈጠር ዓለም። ብርሃን ዘእምብርሃን አምላክ ዘእምአምላክ ዘበአማን። ዘተወልደ ወአኮ ዘተገብረ ዘዕሩይ ምስ አብ በመለኮቱ። ዘቦቱ ኲሉ ኮነ ወዘእንበሌሁሰ አልቦ ዘኮነ ወኢምንትኒ ዘበሰማይኒ ወዘበምድርኒ። ዘበእንቲአነ ለሰብእ ወበእንተ መድኃኒትነ ወረደ እምሰማያት። ተሰብአ ወተሠገወ እመንፈስ ቅዱስ ወእማርያም እምቅድስት ድንግል። ኮነ ብእሴ ወተሰቅለ በእንቲአነ በመዋዕለ ጲላጦስ ጴንጤናዊ ሐመ ወሞተ ወተቀብረ ወተንሥአ እሙታን አመ ሣልስት ዕለት በከመ ጽሑፍ ውስተ ቅዱሳት መጻሕፍት። ዐርገ በስብሐት ውስተ ሰማያት ወነበረ በየማነ አቡሁ ዳግመ ይመጽእ በስብሐት ይኰንን ሕያዋነ ወሙታነ ወአልቦ ማኅለቅት ለመንግሥቱ። ወነአምን በመንፈስ ቅዱስ እግዚእ ማሕየዊ ዘሠረፀ እምአብ ንስግድ ሎቱ ወብሰብሖ ምስለ አብ ወወልድ ዘነበበ በነቢያት። ወነአምን በአሐቲ ቅድስት ቤተ ክርስቲያን እንተ ላዕለ ኲሉ ጉባኤ ዘሐዋርያት፡ ወነአምን በአሐቲ ጥምቀት ለሥርየት ኃጢአት። ወንሴፎ ትንሣኤ ሙታን ወሕይወተ ዘይመጽእ ለዓለመ ዓለም።
-
ቅዱስ ቅዱስ ቅዱስ እግዚአብሔር
በድምጽቅዱስ ቅዱስ ቅዱስ እግዚአብሔር
ቅዱስ ቅዱስ ቅዱስ እግዚአብሔር ጸባዖት ፍጹም ምሉእ ሰማያተ ወምድረ ቅድሳተ ስብሐቲከ። ንሰግድ ለከ ክርስቶስ ምስለ አቡከ ኄር ሰማያዊ ወመንፈስከ ቅዱስ ማሕየዊ እስመ መጻእከ ወአድኃንከነ።
እሰግድ ለአብ ወወልድ ወመንፈስ ቅዱስ አሐተ ስግደተ (3 ጊዜ) እንዘ አሐዱ ሠለስቱ ወእንዘ ሠለስቱ አሐዱ ይሤለሱ በአካላት ወይትወሐዱ በመለኮት እሰግድ ለእግዝእትነ ማርያም ድንግል ወላዲተ አምላክ እሰግድ ለመስቀለ እግዚእነ ኢየሱስ ክርስቶስ ዘተቀደሰ በደሙ ክቡር መስቀል ኃይልነ መስቀል ጽንዕነ መስቀል ቤዛነ መስቀል መድሃኒተ ነፍስነ። አይሁድ ክሕዱ። ንሕነሰ አመነ ወእለ አመነ በኃይለ መስቀሉ ድኅነ። -
ስብሐት ለአብ
በድምጽስብሐት ለአብ
ስብሐት ለአብ ስብሐት ለወልድ ስብሐት ለመንፈስ ቅዱስ /3/ ፤ስብሐት ለእግዝእትነ ማርያም ድንግል ወላዲተ አምላክ ፤ ስብሐት ለመስቀለ እግዚእነ ኢየሱስ ክርስቶስ ፤ ክርስቶስ በምሕረቱ ይዘክረነ ፤ አመ ዳግም ምጽአቱ ኢያስተኃፈረነ ፤ ለሰብሖተ ስሙ ያንቅሐነ ፤ ወበአምልኮቱ ያጽንአነ ፤ እግዝእትነ ማርያም ድንግል ወላዲተ አምላክ አዕርጊ ጸሎትነ ፤ ወአስተስርዪ ኩሎ ኃጢአተነ ፤ ቅድመ መንበሩ ለእግዚእነ ፤ ለዘአብልአነ ዘንተ ኅብስተ ፤ ወለአስተየነ ዘንተ ጽዋዐ ፤ ወለዘሠርዐ ለነ ሲሳየነ ወዐራዘነ ፤ ወለዘተዓገሰ ለነ ኩሎ ኃጢአተነ ፤ ወለዘወሀበነ ሥጋሁ ቅዱሰ ወደሞ ክቡረ ፤ ወለዘአብጽሐነ እስከ ዛቲ ሰዓት፡፡ ነሀብ ሎቱ ስብሐተ ወአኰቴተ ለእግዚኣብሔር ልዑል ወለወላዲቱ ድንግል ወለመስቀሉ ክቡር ይትአኰት ወይሰባሕ ስሙ ለእዚአብሔር አምላክነ ወትረ በክሉ ጊዜ ወበኩሉ ሰዓት፡፡
-
ጸሎተ እግዝእትነ ማርያም
በድምጽጸሎተ እግዝእትነ ማርያም
ጸሎተ እግዝእትነ ማርያም ድንግል ወላዲተ አምላክ። ታዐብዮ ነፍስየ ለእግዚአብሔር። ወትትኃሠይ መንፈስየ በአምላኪየ ወመድኃንየ፤ እስመ ርእየ ሕማማ ለአመቱ። ናሁ እምይእዜሰ ያስተበፅዑኒ ኩሉ ትዉልድ። እስመ ገብረ ሊተ ኃይለ ዐቢያተ ወቅዱስ ስሙ። ወሣህሉኒ ለትውልደ ትዉልድ ለእለ ይፈርህዎ። ወገብረ ኃይለ በመዝራዕቱ፡ ወዘረዎሙ ለእለ ያዐብዩ ኅሊና ልቦሙ፡ ወነሠቶሙ ለኃያላን እመናብርቲሆሙ። አዕበዮሙ ለትሑታን፡ ወአጽገቦምሙ እምበረከቱ ለርኁባን፡ ወፈነዎሙ ዕራቆሙ ለብዑላን ወተወክፎ ለእስራኤል ቍልዔሁ፡ ወተዘከረ ሣህሎ ዘይቤሎሙ ለአበዊነ ለአብርሃም ወለዘርኡ እስከ ለዓለም። ሉቃስ ፩፡፵፮-፶፭።